Г.Алтан тойргийн гадна гэдгээ мэдэгдэв

“Эрдэнэт” үйлдвэрийн 51 хувийг барьцаалж, Өмнөд Африкийн “Стандарт” банкнаас их хэмжээний зээл авсан гэх хэрэг улс төрийн хүрээнд нэлээд анхаарал татаж байна.  Өнгөрсөн долоо хоногт “Жаст” группийн  захирал Ш.Батхүүг баривчилж, хорих 461 дүгээр ангид цагдан хорьсон юм.  2009 оноос эхтэй уг хэрэг шийдэгдэхгүй явсаар  Арбитрын шүүхээс  Монгол Улсын Засгийн газрыг хариуцагчаар татсанаар хэргийн үнэн мөнийг тогтоох ажил эрчимжиж байгаа гэхэд болно.   АТГ-аас “Хэргийг шалгах тусам цар хүрээ нь улам нэмэгдэж байгаа. Энэ хэрэгт холбогдогч эрхмүүд ял завших боломжгүй” хэмээн мэдэгдсэн.  Мөн “Жаст”-ын Ш.Батхүүг баривчлахын өмнө  АТГ-аас “Эрдэнэт” үйлдвэрт мөрдөн шалгах ажиллагааг 14 хоногийн турш явуулсан гэдэг.  Ийнхүү хэргийн гол эзнийг ямартай ч саатууллаа.  Хэрэг яаж ч  үргэлжилж мэдэхээр байна.   Ерөнхий сайд асан С.Баярыг Эрдэнэтийн 51 хувь болон Оюутолгойн гэрээтэй холбоотой  асуудлаар  АТГ-т 10 гаруй  цаг байцаалаа.   Мөн Нийслэлийн Ерөнхий  прокуророос түүнд эрүү үүсгэж, яллагдагчаар татсан  талаар  баттай эх сурвалж мэдээлсэн.  Гэхдээ   мэдээлэл цацагдаад нэг их удаагүй байтал пропуророос түүний яллагдагчаар татаагүй талаар мэдэгдсэн.  Аливаа улс төрийн хэрэгт тийм ч амархан дуугарч, ам ангайдаггүй прокурорын газар С.Баярын хэрэгт  нэлээд шуурхай ажиллана лээ.  Өмнө нь төрийн албыг  наймаалцсан гэх 60 тэрбум, Улаанбаатар төмөр замын хэрэгт яг л ийм  шуурхай ажиллаж,  хаасан гэдгээ  сүр  дуулиантайгаар мэдэгдэж байсан.  Ийнхүү “Стандарт” банкны хэрэгт С.Баярыг холбон шалгаж эхэллээ.  Дараа нь “Алтжин” группын захирал Г.Алтанг  саатуулан баривчилсан, түүнд хилийн хориг  тавьсан талаар шуугиж эхлэв.  “Стандарт”  банкнаас их хэмжээний зээл авсан гэх “Жаст” групптэй бизнесийн нягт холбоотой гэсэн мэдээлэл бий.  Энэ талаар Г.Алтангаас тодруулахад “Намайг сүүлийн үед АТГ-аас байцаасан, гэрчээр дуудсан, хилийн хориг тавьсан,  “Жаст”-ийн Ш.Батхүүтэй холбоотой зэрэг асуудлаар олон нийтэд мэдээлэл цацагдаж байна.  Хуулийн байгууллагаас  надад хэн ч хандаагүй. Ямар ч байцаалт өгөөгүй . “Жаст”-ын Ш.Батхүүг ч би мэдэхгүй. Миний  хүү Ж.Сүрэнгээр дамжуулан “Хадгаламж” банкнаас 32 сая.ам долларын зээл авч байсан юм билээ. Үүнээс өөр ямар нэгэн байдлаар холбоогүй” гэв. Ийнхүү ямартай ч Г.Алтан тойргийн гадна гэдгээ мэдэгдээд байна.   Монголын эдийн засгийн томоохон хөшүүрэг болсон “Эрдэнэт” үйлдвэрийг барьцаалж  зээл авсан гэх асуудал цааш хэрхэн үргэлжилэх нь сонирхолтой хэвээр байна.
Т.Батсайхан

Сэтгэгдэл:

Сэтгэгдэлээ оруулах
Нэрээ орулна уу

*